Արամ Ա–ն ասել է, որ հայության մեծամասնությունը դրսում է ապրում, իսկ սփյուռքը սկսել է մաշվել ու գունաթափվել։

Սփյուռքըսկսել է անտարբեր լինել ինքն իր նկատմամբ, հուսախաբ` Հայաստանի նկատմամբ, հատկապես, Արցախի պատերազմից հետո։ 2022 թվականը Սփյուռքի տարի հռչակելու առիթով լիբանանահայ մտավորականների հետ հանդիպման ժամանակ ասել է Ն.Ս.Օ.Տ.Տ. Արամ Ա. Վեհափառ Հայրապետը։Արամ Ա–ի խոսքով` 2022-ը Սփյուռքի տարի է հռչակվել, քանի որ սփյուռքի մասին խոսելն այլևս սովորական երևույթ չէ, քանի որ սփյուռքը տագնապի մեջ է։

«Նման տարի հռչակելու համար լուրջ պատճառներ ունեի` սփյուռքը սկսել է տարածվել ու ծավալվել։ Հայության մեծամասնությունը դրսում է ապրում, իսկ սփյուռքը սկսել է մաշվել ու գունաթափվել։ Երիտասարդությունը սկսել է հեռանալ մեր կյանքից, մեր կառույցներից։ Օտարի ներկայությունը հայի կյանքի մեջ զգալի է դարձել»,–ասել է Արամ Ա–ն։Նա հավելել է, որ սփյուռքը վերակազմակերպվելու կարիք ունի։

Հիշեցնենք, որ հունվարի 9-ին հայտնի դարձավ` Մեծի Տանն Կիլիկիո կաթողիկոս Արամ Առաջինը 2022 թվականը հռչակել է Սփյուռքի տարի։ Այդ մասին հայրապետական հռչակագիրն ընթերցվել է նույն օրն Անթիլիասի Մայրավանքի Ս. Գրիգոր Լուսավորիչ Մայր Տաճարում մատուցված պատարագի ժամանակ։