ՀՀ վարչապետ Նիկոլ Փաշինյանը Բելառուսի վարչապետ Ռոման Գոլովչենկոյի հետ հանդիպման ժամանակ հայտարարել է, որ Հայաստանն ու Բելառուսն առևտրատնտեսական համագործակցության զարգացման լավ դինամիկա ունեն, և դրան մեծապես նպաստում են Եվրասիական տնտեսական միության մեխանիզմները։ Այս մասին հաղորդել է Բելառուսի կառավարության մամուլի ծառայությունը:
«Այժմ ԵԱՏՄ-ի դերը մեծանում է, քանի որ, ցավոք, աշխարհում բարդ տնտեսական ժամանակներ են։ Պետք է ասեմ, որ այն մեխանիզմները, որոնք մենք ունենք ԵԱՏՄ-ում, տեղ-տեղ շատ են օգնում այդ իրավիճակներում։ Օրինակ ՝ Բելառուսի և Հայաստանի միջև ապրանքաշրջանառությունն այս տարի կրկնապատկվել է։ Մենք շատ լավ տնտեսական դինամիկա ունենք»,- ասել է Փաշինյանը։
Ըստ Բելառուսական կողմի տվյալների՝ ընթացիկ տարվա հունվար-օգոստոսին Բելառուսի և Հայաստանի միջև ապրանքաշրջանառությունը կազմել է 105,7 մլն դոլար։
Բելառուսի վարչապետի խոսքով` երկու երկրների միջև առևտուրը հավասարակշռված է՝ ավելանում է ինչպես Բելառուսից Հայաստան արտահանումը, այնպես էլ՝ Հայաստանից Բելառուս ներմուծումը։