ESG Sustainalytics ոլորտում առաջատար վերլուծական ընկերության փորձագետները ներկայացրել են երկրորդ կողմի կարծիքը Յունիբանկի «կանաչ» պարտատոմսերի թողարկման հայեցակարգի վերաբերյալ եւ հաստատել դրա համապատասխանությունը միջազգային չափանիշներին եւ Green Bonds Principles 2021-ի պահանջներին:
Բանկից հայտնել են, որ «Կանաչ» պարտատոմսերի թողարկումը, որոնց վաճառքից ստացված միջոցները ներդրվում են բնապահպանական նախագծերում, արագ թափ հավաքող համաշխարհային միտում է։
«Յունիբանկն արդեն սկսել է իր զարգացման ռազմավարության մեջ ներառել բնապահպանական, սոցիալական եւ կառավարման պատասխանատվության (ESG) սկզբունքները եւ 2022 թվականի սեպտեմբերին ավարտել է Յունիբանկի Green Bond Framework-ի մշակումը, ըստ որի՝ նախատեսում է սկսել կանաչ պարտատոմսերի թողարկումը։ Ներգրավված ներդրումները կուղղվեն Հայաստանում էներգաարդյունավետության, գյուղատնտեսության մեջ բնական ռեսուրսների ռացիոնալ օգտագործման, ջրային ռեսուրսների մաքրման եւ թափոնների կառավարման ոլորտներում նախագծերի ֆինանսավորմանը։ Այդ նպատակով բանկում կստեղծվի կանաչ պարտատոմսերի եւ կայուն զարգացման պարտատոմսերի կոմիտե:
2021 թվականին կայուն պարտատոմսերի համաշխարհային թողարկումը, որոնցից միջոցներն ուղղվում են սոցիալական եւ բնապահպանական նպատակներին, հասել է 859 միլիարդ դոլարի, ինչը 1,5 անգամ ավելի է, քան 2020 թվականին։ Թողարկման ծավալի կեսից ավելին բաժին է ընկել «կանաչ» պարտատոմսերին։ Միջոցների 80%-ն ուղղվել է վերականգնվող էներգիայի, կայուն շինարարության եւ ցածր ածխածնային տրանսպորտի զարգացմանը»,- ասված է բանկի հաղորդագրության մեջ:
Նշվում է, որ Յունիբանկը լիովին աջակցում է պատասխանատու ներդրումների միտմանը եւ ողջունում բնապահպանական խնդիրների նկատմամբ աճող ուշադրությունն ու շրջակա միջավայրի նկատմամբ հոգատարությունը:
«Յունիբանկն արդեն ներդրել է բնապահպանական եւ սոցիալական կառավարման համակարգ (ESMS), որը մշակվել է Միջազգային ֆինանսական կորպորացիայի ղեկավարությամբ: Յունիբանկի տվյալների մշակման կենտրոնն ամբողջությամբ սնուցվում է արեւային էներգիայով:
«Կանաչ» պարտատոմսերի թողարկումից ստացված միջոցները կուղղվեն բնապահպանական նախագծերի իրականացմանը, ինչը կնպաստի ածխածնային ցածր, կլիմայակայուն եւ էկոլոգիապես մաքուր տնտեսության անցմանը։
Ըստ Sustainalytics-ի ամփոփագրի՝ Յունիբանկի «կանաչ» պարտատոմսերի թողարկման եւ տեղաբաշխման հայեցակարգն արդյունավետ է եւ արժանահավատ: Sustainalytics-ն ակնկալում է, որ Յունիբանկի կողմից ֆինանսավորվող բնապահպանական ծրագրերը կբարելավեն շրջակա միջավայրի վիճակը եւ կնպաստեն Հայաստանում «կանաչ» էներգիայի զարգացմանը՝ հիմնվելով վերականգնվող աղբյուրների օգտագործման վրա»,- ասված է հաղորդագրությունում: