Ուկրաինայի տնտեսությանն աջակցելու շրջանակում ԱՄՆ իշխանությունները կարող են համաձայնեցնել ուկրաինական բյուջեին ամսական $1,5 միլիարդի չափով տրանշեր հատկացնելու հարցը։
«Կոմերսանտ»-ի փոխանցմամբ՝ այս մասին հայտնում է Bloomberg-ը՝ վկայակոչելով հարցի քննարկմանը ծանոթ աղբյուրները։ Նրանց խոսքով՝ ամենամսյա օգնությունը կտրամադրվի, քանի դեռ շարունակվում է Ռուսաստանի հետ ռազմական հակամարտությունը։
Գործակալության տվյալներով՝ ԱՄՆ իշխանությունները կոչ են անում Եվրամիությանը նմանատիպ օգնություն ցուցաբերել Ուկրաինային։ ԱՄՆ նախագահի վարչակազմն արդեն քննարկել է այդ հարցը Եվրամիության պաշտոնական ներկայացուցիչների հետ, հայտնում է Bloomberg-ը։
Աղբյուրներից մեկի փոխանցմամբ՝ ԵՄ երկրների ղեկավարները քննարկում են այդ հարցը։ Ինչպես ԱՄՆ իշխանությունները, նրանք եւս ցանկանում են ներդնել օգնության կանոնավոր մեխանիզմ, որը կաջակցի Ուկրաինայի տնտեսությանը Ռուսաստանի հետ ռազմական հակամարտության ժամանակ:
Սակայն ԵՄ-ում ամսական տրանշի չափը դեռ հաստատված չէ։ ԵՄ առաջնորդները հաջորդ շաբաթ Չեխիայում կայանալիք ոչ պաշտոնական գագաթնաժողովում կարող են քննարկել 2023 թվականին Ուկրաինային ֆինանսական օգնություն տրամադրելու հարցը։
Միաժամանակ, հոկտեմբերի 1-ին ԱՄՆ նախագահ Ջո Բայդենը ստորագրել է օրենք Ուկրաինային $12,4 միլիարդի լրացուցիչ օգնություն հատկացնելու մասին։