Այսօր ունենք արդեն առնվազն 15 համաձայնեցված կետ, որը համարում եմ շատ մեծ ձեռքբերում։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը՝ խոսելով Ադրբեջանի հետ հարաբերությունների կարգավորման գործընթացի և վարչապետ Նիկոլ Փաշինյանի՝ տարածաշրջանում հաղորդակցությունների ապաշրջափակման վերաբերյալ այսօրվա հոդվածի մասին։
Նա նշեց, որ էսկալացիայի պատճառներ ստեղծելու հետ կապված պետք է ամեն ինչ անենք, որ «նման առիթ կամ պատճառ չլինի»․
«ՀՀ–ն որևէ տարածքային պահանջ չունի և իր ստանձնած պարտավորություններին և համաձայնագրերին շատ ուժեղ հետևում է, և հետևողականորեն շարունակելու է աշխատանքը բոլոր խնդրահարույց հարցերը լուծելու ուղղությամբ։ Եվ էսկալացիայի վտանգ կա, բայց առիթ կամ պատճառ, կարծում եմ, չկա»,– ասաց Սիմոնյանը՝ նշելով, որ պետք է միշտ ելնել ամենաբացասական կանխավարկածից։
«Յուրաքանչյուր պահի յուրաքանչյուր բան կարող է տեղի ունենալ, և որևէ բան չբացառենք, վստահ չլինենք, որ ամեն ինչ այսպես կամ այնպես է լինելու»,– հավելեց ԱԺ նախագահը՝ նշելով, որ իրադարձությունները շատ արագ են զարգանում, կարող է շատ հետաքրքիր զարգացումներ լինեն մոտ օրերս։