«Եվրոթերմ» ՓԲԸ պարտատոմսերը ցուցակվել են Հայաստանի ֆոնդային բորսայում. ռեզիդենտ եւ ոչ ռեզիդենտ ֆիզիկական ու իրավաբանական անձինք կարող են ձեռք բերել ընկերության պարտատոմսերը։
«Եվրոթերմ» ՓԲԸ-ն Հայաստանի ֆոնդային բորսայում ցուցակել է 500 մլն ՀՀ դրամ ընդհանուր անվանական ծավալով, 10,000 ՀՀ դրամ անվանական արժեքով 50,000 պարտատոմս։ Պարտատոմսերը ներառվել են պարտատոմսերի հիմնական Abond ցուցակում։ Վերոնշյալ պարտատոմսերով թույլատրվել է հասցեական առեւտուրը եւ Ռեպո գործարքների կնքումը։ Ցուցակված պարտատոմսերի մասին իմանալ ավելին այստեղ:
Ֆոնդային բորսայից հայտնել են, որ «Եվրոթերմ» ՓԲԸ-ի կողմից թողարկված ընդհանուր 500 մլն ՀՀ դրամ արժողությամբ պարտատոմսերն ամբողջությամբ տեղաբաշխվել են։ Պարտատոմսերի տեղաբաշխումն իրականացրել է «Կոնվերս բանկ» ՓԲԸ-ն։
«Եվրոթերմի պարտատոմսերի ցուցակումը Հայաստանի ֆոնդային բորսայում նշանակալի քայլ է հայկական ներդրումային շուկայի զարգացման համար։ Հաշվի առնելով պարտատոմսերի հանդեպ աճող հետաքրքրությունը՝ մեր կարծիքով Եվրոթերմի պարտատոմսերի առեւտուրը բորսայական հարթակում բավականին ակտիվ կլինի։
Հայաստանի ֆոնդային բորսայի կարեւորագույն առաքելություններից մեկն է կապիտալի շուկայի զարգացումը, որի ուղղությամբ բազմաթիվ նախագծեր ենք մշակում եւ իրականացնում։ Մասնավորապես՝ Բորսան մշտապես կարեւորում է նոր գործիքների եւ արժեթղթերի զարգացումը եւ աջակցում է բոլոր այն ընկերություններին, որոնք ցանկանում են թողարկում անել», – նշել է Հայաստանի ֆոնդային բորսայի գլխավոր տնօրեն Հայկ Եգանյանը:
Կոնվերս բանկի ներդրումային դեպարտամենտի տնօրեն Գրիգորի Զաքարյանն ասել է. «Հայաստանում կապիտալի շուկայի հետագա զարգացումն անհնար է այդ թվում առանց թողարկողների եւ թողարկումների քանակական եւ ծավալային աճի, առանց գործընթացում իրական հատվածի ընկերությունների ներառման:
Եվրոթերմի պարտատոմսերի տեղաբաշխումը արդյունավետ համագործակցություն էր ու բանկի համար նոր հաջողված փորձառություն, ինչի շնորհիվ մեր գործընկեր Եվրոթերմ ընկերությունը հասանելիություն ստացավ ֆինանսների ներգրավման այլընտրանքային տարբերակի: Իսկ պարտատոմսերի տեղաբաշխման ավարտը նախատեսվածից սեղմ ժամկետում եւս մեկ անգամ փաստեց իրական հատվածում գործող վստահելի ընկերությունների պարտատոմսերի նկատմամբ աճող պահանջարկի եւ այս ոլորտում Կոնվերս Բանկի քայլերի արդյունավետության մասին:
Այսօր պարտատոմսերի թողարկման ու տեղաբաշխման հարցում աջակցում ենք տարբեր փոքր եւ միջին ընկերությունների՝ նրանց համար ստեղծելով ֆինանսների ներգրավման նոր, այլընտրանքային հնարավորություններ, իսկ հաճախորդներին ընձեռելով ներդրումների նոր հնարավորություններ»:
Եվրոթերմ ընկերության գլխավոր տնօրեն Վահե Ղազարյանի խոսքով՝ ընկերության պարտատոմսերում մեծ թվով ֆիզիկական անձ ներդրողների առկայությունը վկայում է Եվրոթերմի նկատմամբ վստահության մասին. «Այս թողարկման ընթացքում ներգրավված միջոցները հիմնականում ուղղվել են ընկերության շրջանառու միջոցների համալրմանը: Չի բացառվում, որ հետագայում ունենանք ավելի մեծածավալ թողարկումներ կապիտալի համալրման կամ նոր բիզնես գաղափարների իրագործման համար»:
«Եվրոթերմ» ՓԲԸ -ի պարտատոմսերը կարող եք ձեռք բերել բացառապես Հայաստանի Ֆոնդային Բորսայի առեւտրային համակարգի միջոցով` մոտենալով Հայաստանի ֆոնդային բորսայի անդամ հանդիսացող ցանկացած բանկ կամ ներդրումային ընկերություն, բացելով բրոքերային հաշիվ եւ ներկայացնելով պարտատոմսերի ձեռք բերման հայտ: