Զբոսաշրջության ոլորտում Վրաստանի ստացած եկամուտը 2022 թվականի ավարտին կգերազանցի $3 միլիարդը, նախօրեին հայտարարել է Վրաստանի էկոնոմիկայի եւ կայուն զարգացման փոխնախարար Մարիամ Կվրիվիշվիլին։
«Այս ցուցանիշն ուղղակիորեն ազդում է նոր աշխատատեղերի ստեղծման եւ տեղի բնակիչների բարեկեցության բարելավման վրա»,- Կվրիվիշվիլիի խոսքերն է մեջբերում ՏԱՍՍ-ը։
Ինչպես նշել է փոխնախարարը ՄԱԿ-ի Զբոսաշրջության համաշխարհային կազմակերպության (UNWTO) գործադիր կոմիտեի նիստում, նման եկամուտ ակնկալելու պատճառն այն է, որ Վրաստանը կարողացել է 100%-ով վերականգնել զբոսաշրջության ոլորտում մինչհամավարակային շահույթի ցուցանիշները։
Մարոկկոյում ընթանում է UNWTO-ի գործադիր կոմիտեի 117-րդ նիստը, որտեղ քննարկվում են զբոսաշրջության եւ ճանապարհորդության ոլորտի արդիական հարցերը։
Ավելի վաղ Վրաստանի էկոնոմիկայի նախարարության Զբոսաշրջության ազգային վարչությունը հայտնել էր, որ այս տարվա հունվարից հոկտեմբեր ընկած ժամանակահատվածում զբոսաշրջությունից Վրաստանի եկամուտը կազմել է ավելի քան $2,8 միլիարդ։
Ինչպես նշվել էր, ընթացիկ տարվա 10 ամսվա շահույթը 183,2%-ով ավելի է 2021 թվականի նույն ցուցանիշներից։ Միայն հոկտեմբերին երկիրը զբոսաշրջությունից վաստակել է գրեթե $338 միլիոն, ինչը 137,1%-ով ավելի է 2021 թվականի հոկտեմբերի համեմատ։
Ընթացիկ տարվա հունվարից հոկտեմբեր ընկած ժամանակահատվածում Վրաստան է իրականացվել ավելի քան 4,3 միլիոն զբոսաշրջային ուղեւորություն, ինչը գրեթե երեք անգամ ավելի է, քան 2021 թվականին։ Ռուսաստանը, Թուրքիան եւ Հայաստանը այն երկրներն են, որտեղից հանգստացողներն ամենից հաճախ են ժամանում Վրաստան։