Միացյալ Նահանգների Պետդեպարտամենտի ներկայացուցիչ Քեմերոն Միլարդը ժամանել է Բաքու: Այս մասին հայտնում է Ադրբեջանում ԱՄՆ դեսպանությունը։
Նշվում է, որ ամերիկացի պաշտոնյան հանդիպումներ կունենա Ադրբեջանի պաշտոնյաների, տնտեսական և քաղաքական փորձագետների, ԱՄՆ կառավարության գործընկերների հետ: Ամերիկյան դիվանագիտական ներկայացուցչության փոխանցմամբ՝ ուրբաթ օրը Միլարդը հանդիպել է Ադրբեջանի խորհրդարանականների հետ, քննարկել երկկողմ հարաբերությունները։
«Քեմերոնն իր հանդիպումներում նշել է, որ Միացյալ Նահանգները աջակցում է Ադրբեջանի ինքնիշխանությանը և անկախությանը, և որ Միացյալ Նահանգները հավատարիմ է Հարավային Կովկասում խաղաղ ապագայի խթանման գործին», – նշված է Բաքվում ԱՄՆ դեսպանատան հաղորդագրության մեջ: