Պարենի եւ գյուղատնտեսության կազմակերպության (ՊԳԿ) պարենի հենանիշային գնային ինդեքսում ներառված պարենային ապրանքների, բացառությամբ հացահատիկային մշակաբույսերի, միջազգային գնանշումներն անկում են արձանագրել:

ՊԳԿ-ից հայտնել են, որ հոկտեմբերին պարենային ապրանքների համաշխարհային գների հենանիշերը հիմնականում կայուն էին, եւ հացահատիկային մշակաբույսերի գների աճը փոխհատուցվել է այլ լայն սպառման սննդամթերքի գնանկումներով:

ՊԳԿ պարենային ապրանքների գնային ինդեքսը, որով գնահատվում է ամենաշատ վաճառվող պարենային ապրանքների զամբյուղի միջազգային գների ամենամսյա փոփոխությունները, հոկտեմբերին միջինում 135,9 միավոր էր, որն աննշան ցածր է սեպտեմբերի նույն ցուցանիշից։

Վերջին տվյալների համաձայն՝ ինդեքսը 14.9%-ով ցածր էր 2022 թվականի մարտի՝ երբեւէ գրանցված ամենաբարձր ցուցանիշից, միաժամանակ, 2,0%-ով բարձր 2021 թվականի հոկտեմբերի տվյալներից։

Հացահատիկային մշակաբույսերի գնային ինդեքսն ամսվա ընթացքում 3,0%-ով բարձրացել է։ Ցորենի համաշխարհային գների աճը 3,2% է կազմել:

Բուսական յուղի գնային ինդեքսում հոկտեմբերին 1,6% անկում է գրանցվել, որը
20%-ով ցածր է նախորդ տարվա հոկտեմբերի մակարդակից։

Կաթնամթերքի գնային ինդեքսը նվազել է 1,7%-ով: Շաքարի գնային ինդեքսը նվազել է 0,6%-ով:

Հոկտեմբերին մսամթերքի գնային ինդեքսը սեպտեմբերի համեմատ 1,4%-ով ցածր էր, ոչխարի, խոզի, տավարի եւ թռչնամսի միջազգային գները նվազել են ներմուծման համաշխարհային պահանջարկի կրճատման եւ արտահանումների աճի պատճառով: