Մեր կուսակցության ծրագրի առանցքային դրույթներից մեկը կանանց եւ տղամարդկանց իրավահավասարության մասին դրույթն էր. այսօր միանշանակ եւ աներկբա ՀՀ պետական կառավարման եւ հանրային կյանքի կառավարման առումով կանանց դերը շարունակաբար մեծանում է: Այս մասին այսօր՝ հոկտեմբերի 29-ին, «Քաղաքացիական պայմանագիր» կուսակցության համագումարի իր ելույթում հայտարարեց ՀՀ վարչապետ Նիկոլ Փաշինյանը:
«Մեր թիմը ստեղծել է պայմաններ, որոնք ի ցույց են դնում, որ մենք հավատարիմ ենք մեր գրած տեքստերին: Այսօր ունենք այնպիսի բացառիկ իրավիճակ, որ ՀՀ-ում առաջին անգամ Վճռաբեկ դատարանի նախագահը կին է, գլխավոր դատախազը կին է, գլխավոր դատախազի տեղակալը կին, Կոռուպցիայի կանխարգելման հանձնաժողովի նախագահը կին է, ԲԴԽ-ում առաջին անգամ իրավաբան-գիտնականների կազմում ընտրվել է կին, ՄԻՊ-ը կին է: Սրանք աննախադեպ ու պատմական փաստեր են: Այն, ինչ նշեցի ուղիղ կապ չունեն մեր կուսակցության հետ, որովհետեւ այս պաշտոնները ապաքաղաքական պաշտոններ են, բայց ուրախ եմ,մ որ կուսակցական ընկեր կանայք որոշակի աննախադեպ արձանագրումներ են արել:
Օրինակ, առաջին անգամ ՀՀ պատմության մեջ ընտրվել է կին քաղաքապետ, մենք ունենք կին մարզպետ, կին նախարար: Սակայն մենք որեւէ մեկին չենք պաշտպանում ուղղակի կին լինելու պատճառով, որովհետեւ դա կլինի գաղափարի աղավաղում: Պարզապես մենք քաջալերում ենք կանանց, որ նրանք համարձակություն դրսեւորեն ու հավակնեն այդ կարգավիճակներին»,-հայտարարեց Փաշինյանը: