ՌԴ իշխանությունները կարող են երկարաձգել Երկարաժամկետ խնայողությունների ծրագրով (ПДС) համաֆինանսավորման ժամկետը։ Դրա ներկայիս պարամետրերը ենթադրում են, որ պետությունը երեք տարվա ընթացքում կավելացնի մինչև 36000 ռուբլի այն քաղաքացիների ներդրումներին, ովքեր ծրագրի մասնակից են դարձել դրա գործունեության առաջին 3 տարիներին: Սակայն ապագայում կարող է քննարկվել քաղաքացիների վճարվող մուծումների համաֆինանսավորման ժամկետը երկարացնելու հարցը, «Իզվեստիային» ասել են ֆինանսների նախարարությունում։
Պետդումայում, որտեղ օրերս ներկայացվել է վերոնշյալ ծրագրի մասին օրինագիծը, չեն բացառել, որ երկարաձգման հարցը կբարձրացվի արդեն օրենսդիրների կողմից նախագծի քննարկման փուլում։ Պետդումայի Ֆինանսական շուկայի հարցերով կոմիտեի ղեկավար Անատոլի Ակսակովը նշել է նաև, որ հնարավոր է առկա ֆինանսական փաստաթղթերում վերանայումներ լինեն այն գործատուների մասով, ովքեր կմասնակցեն քաղաքացիների վճարումների համաֆինանսավորմանը։
Անցյալ շաբաթ Պետդումա է ներկայացվել Երկարաժամկետ խնայողությունների ծրագրի մասին օրենքի նախագիծը։ Ծրագրի հիմնական նպատակը, ինչպես նշում են փաստաթղթի հեղինակները, յուրաքանչյուր ռուսաստանցու համար երկարաժամկետ խնայողությունների լրացուցիչ հնարավորություններ ստեղծելն է։
Աղբյուրները պետք է լինեն քաղաքացիների և գործատուների կամավոր վճարումները, կենսաթոշակային խնայողությունները։ Ծրագրին մասնակցությունը ակնկալվում է 15 տարվա ընթացքում։ Քաղաքացիներին խրախուսելու համար իշխանությունները նախատեսել են հարկային նվազեցում, որը կարող է հասնել մինչև 52 հազար ռուբլու, ինչպես նաև տարեկան մինչև 36 հազար ռուբլու համաֆինանսավորում։
Այնուամենայնիվ, վերջին աջակցության միջոցը նախատեսված չէ ծրագրի ողջ տևողության համար: Պայմանները, ըստ օրինագծի, նախատեսում են տարեկան ֆինանսավորում բյուջեից երեք տարի ժամկետով այն քաղաքացիների համար, ովքեր ծրագրի մեջ են մտել դրա գործունեության առաջին երեք տարիներին։ Այսինքն՝ յուրաքանչյուր մասնակից պետությունից կարող է ստանալ առավելագույնը 108 հազար ռուբլի։