Բրիտանական Revolut ֆինտեխ ստարտափը հայտնել է, որ 2021 թվականին ընկերության զուտ շահույթը կազմել է 26 միլիոն ֆունտ ($31,4 միլիոն), իսկ եկամուտը եռապատկվել է՝ 220 միլիոն ֆունտից ($265,6 միլիոն) հասնելով 636 միլիոն ֆունտի ($767,9 միլիոն):
Այսպիսով, 2021 թվականը Revolut-ի համար դարձավ առաջին շահութաբեր տարին։ Ընկերությունը 2020 թվականն ավարտել էր 223,6 միլիոն ֆունտ ($270 միլիոն) զուտ վնասով:
Forbes ամսագրի ռուսաստանյան հանդեսի փոխանցմամբ՝ ստարտափն իր զեկույցում հայտնել է նաեւ, որ 2021 թվականին շաբաթական ակտիվ հաճախորդների թիվն աճել է գրեթե մեկուկես անգամ՝ հասնելով 16,4 միլիոնի, իսկ այժմ նրանց թիվն ավելի քան 27 միլիոն է։ Համախառն շահույթը (հասույթի եւ ծառայությունների ինքնարժեքի տարբերությունը) 2021 թվականին նույնպես աճել է՝ 33%-ից հասնելով 70%-ի։ Ընկերությունը հայտարարել է, որ իր եկամտի ամենամեծ աղբյուրը Foreign Exchange and Wealth ուղղությունն է (ներառյալ՝ արժույթի փոխանակման միջնորդավճարները եւ կրիպտոարժույթների ու այլ ակտիվների առուվաճառքի բիզնեսը):
«2021 թվականին մենք շահույթ ստացանք, չնայած այն հանգամանքին, որ տնտեսությունը երկարատեւ շոկի մեջ էր՝ կապված ամբողջ աշխարհում COVID-19-ի հետեւանքների հետ։ Միաժամանակ, թվային ծառայությունների արագ ներդրման եւ հեռավար աշխատանքի շնորհիվ մեր հաճախորդների թիվն ավելացել է, նրանք սկսել են ավելի շատ օգտվել մեր հավելվածից»,- ընկերության հիմնադիր Նիկոլայ Ստորոնսկու խոսքերն է մեջբերում Financial Times-ը։
Ըստ հաշվետվության՝ 2022 թվականին Revolut-ի եկամուտը շարունակել է աճել, սակայն ավելի դանդաղ տեմպերով՝ ավելանալով 30%-ով՝ մինչեւ 850 միլիոն ֆունտ ($1․027 միլիարդ)։ Անցած տարվա շահույթի մակարդակը ստարտափը չի բացահայտել։ Ընկերության մամուլի հաղորդագրության համաձայն՝ Revolut-ի ֆինանսական տնօրեն Միկո Սալովարան եկամուտների աճը բացատրել է հավելվածի միջոցով վճարումների քանակի ավելացմամբ։ Դրանք ավելի շատ են դարձել հաճախորդների հոսքի շնորհիվ, ինչպես նաեւ այն պատճառով, որ 2022 թվականին նրանք կարողացել են ավելի շատ ճանապարհորդել։
Revolut-ը մի քանի ամսով ուշացրել էր 2021 թվականի իր ֆինանսական հաշվետվության հրապարակումը։ Ֆինանսական արդյունքներն ընկերությունը պետք է ներկայացներ Մեծ Բրիտանիայի գրանցման պալատ 2022 թվականի սեպտեմբերին, սակայն չի արել դա: Ստարտափին հնարավորություն էին տվել ներկայացնել հաշվետվությունը մինչեւ դեկտեմբերի ավարտը, սակայն այդ ժամկետում էլ ընկերությունը չէր տեղավորվել։ Դեկտեմբեր ամսվանից Revolut-ի 2021 թվականի հաշվետվությունը Ֆինանսական հաշվետվությունների խորհրդի կողմից ճանաչվել էր ժամկետանց:
Ինչու է ուշանում Revolut ֆինտեխ ստարտափի բրիտանական բանկային լիցենզիան21.02.2023 | 10:04 Ինչու է ուշանում Revolut ֆինտեխ ստարտափի բրիտանական բանկային լիցենզիան
Վերջերս The Observer-ը (պատկանում է The Guardian-ին) գրել էր, որ կադրերի արտահոսքը, հաշվետվությունների ուշացումները եւ Ռուսաստանի հետ կապերն այն հանգամանքներն են, որոնց պատճառով Revolut-ը մինչ օրս չի ստացել բանկային լիցենզիա Մեծ Բրիտանիայում:
Նշվում էր, որ Մեծ Բրիտանիայում Revolut-ին տուգանք է սպառնում՝ 2021 ֆինանսական տարվա հաշվետվությունների ներկայացման վերջնաժամկետը խախտելու համար: Ստարտափն, իր հերթին, հայտարարել էր, որ հաշվետվության ուշացման համար պետք է պատասխան տան իր աուդիտորները BDO-ից։ Հարցմանն ի պատասխան BDO-ում նշել էին, որ չեն կարող մեկնաբանել կոնկրետ ստուգումները։