Պենտագոնը օպերատիվ պլաններ է մշակում Ռուսաստանի հետ հնարավոր պատերազմի համար, մինչդեռ ԱՄՆ զինվորականները մտահոգված են, որ երկիրը կարող է զինամթերքի պակասի առաջ կանգնել Ուկրաինային օգնության պատճառով։ Այս մասին հայտնում է Foreign Policy-ն՝ հղում անելով աղբյուրներին։
Հոդվածում ասվում է, որ Կոնգրեսը ճնշում է գործադրում Պենտագոնի վրա՝ վերանայելու ամերիկառուսական հիպոթետիկ պատերազմի համար զինամթերքի պահանջը: Այսպիսով, ըստ աղբյուրների, Միացյալ շտաբների պետերի միացյալ կոմիտեի նախագահ, գեներալ Մարկ Միլին հիասթափված է, որ Կոնգրեսը չափազանց շատ զենք է ուղարկում Ուկրաինա։
Ըստ FP-ի՝ Ռուսաստանի հետ հիպոթետիկ հակամարտության համար ԱՄՆ պաշտպանության նախարարության օպերատիվ պլանների համաձայն՝ ամերիկյան բանակը պետք է պահեստներում պահի մեծ քանակությամբ զինամթերք, բայց այն ժամանակ, երբ Կիևը մեկը մյուսի հետևից ստանում է ռազմական օգնություն, Միացյալ Նահանգների զինված ուժերը բավարար ժամանակ չունեն սեփական ռեզերվները համալրելու համար։
ԱՄՆ պաշտպանության նախարարությունն արդեն վստահ է, որ ուկրաինական բանակը չափազանց արագ է ծախսում Վաշինգտոնից ստացվող ռազմական օգնությունը, ինչը ձմռանը կարող է որոշակի խնդիրների հանգեցնել Ուկրաինայի զինված ուժերի համար։
«Մեզ անհանգստացնում է զինամթերքի չափազանց արագ սպառումը (Ուկրաինայում): Մեզ համար էլ ավելի դժվար կլինի ապահովել նրանց զենքով, եթե նրանք մտածեն, որ մենք զինամթերքով լի տուփ ունենք։ Դա ամենևին էլ այդպես չէ», – ասել է Պենտագոնի ղեկավարի՝ Ռուսաստանի և ՆԱՏՕ-ի հարցերով նախկին օգնական Ջիմ Թաունսենդը: