Հետաքննությունների դաշնային բյուրոյի գործակալները խուզարկություն են անցկացրել ԱՄՆ նախկին նախագահ Դոնալդ Թրամփին պատկանող տներից մեկում։ Այս մասին հաղորդում է Reuters-ը։ ԱՄՆ նախկին նախագահը անդրադառնալով խուզարկությանը նշել է․ «Համապատասխան պետական օրգանների հետ աշխատանքից ու համագործակցությունից հետո այս չհայտարարված ստուգայցն իմ տանը ոչ անհրաժեշտ էր, ոչ էլ տեղին»։
Թրամփի խոսքով՝ Ֆլորիդա նահանգի Փալմ Բիչ քաղաքում գտնվող իր Մար-ա-Լագո կալվածքում ՀԴԲ-ն խուզարկություն է անցկացրել օգոստոսի 8-ին, որի ժամանակ բացել են անգամ չհրկիզվող պահարանը։
Ինչպես հաղորդում է The New York Times-ը՝ հղում անելով հետաքննության ընթացքին ծանոթ աղբյուրներին, խուզարկությունը կապված է եղել նախկին նախագահի տանը գտնվող գաղտնի փաստաթղթերի հետ։
«Խուզարկությունը կենտրոնացած էր այն նյութերի վրա, որոնք պարոն Թրամփն իր հետ իր անձնական ակումբ ու նստավայր Մար-ա-Լագո էր բերել Սպիտակ տունը լքելիս։ Արկղերի պարունակությանը ծանոթ մարդու խոսքով՝ դրանցում գաղտնի փաստաթղթերի բազմաթիվ էջեր էին», – գրում է թերթը։
Պարբերականի տվյալներով՝ Ազգային արխիվի պաշտոնյաների պահանջից հետո Թրամփն ամիսներ շարունակ հետաձգել է կարևոր նյութերով 15 տուփի վերադարձը և արել է դա միայն այն ժամանակ, երբ սպառնացել են դրանց վերադարձման համար միձոցներ ձեռնարկել։
