Եվրասիական միության կառավարությունների ղեկավարները ստորագրել են արժեթղթերի տեղադրման և շրջանառության անդրսահմանային թույլտվության մասին համաձայնագիրը: Հայաստանից փաստաթուղթը ստորագրել է փոխվարչապետ Մհեր Գրիգորյանը: Ստորագրման արարողությունը կայացել է Ալմաթիում՝ Եվրասիական միջկառավարական խորհրդի նիստի ընթացքում:
Ըստ համաձայնագրի՝ ԵԱՏՄ երկրների ֆոնդային բորսաները պետք է հավասար պայմաններով տեղադրեն իրենց և միության մյուս չորս երկրների արժեթղթերը: Այս կանոնը կգործի նաև զուգահեռ տեղադրման համար (երբ, օրինակ, հայկական ընկերությունը իր բաժնետոմսերը կամ պարտատոմսերը տեղադրում է միաժամանակ Երևանի և Մոսկվայի բորսաներում):
Միության երկրների ֆինանսական կարգավորիչներն անհրաժեշտության դեպքում պետք է տեխնիկական աջակցություն ցուցաբերեն բորսաներին։
Համաձայնագիրն ուժի մեջ կմտնի ԵԱՏՄ բոլոր հինգ երկրների խորհրդարաններում վավերացումից հետո:
Այս համաձայնագիրը ԵԱՏՄ ընդհանուր բորսային շուկայի հայեցակարգի մի մասն է։ Հայեցակարգը քննարկվել է անցյալ տարվա սեպտեմբերին Երևանում կայացած Եվրասիական միջկառավարական խորհրդի նիստում:
Դրա ստեղծման միջոցառումները նախատեսվում է ավարտել 2030 թվականին։