«Սբերբանկը» հայտեր է ներկայացրել Հայաստանում գրանցելու իր ապրանքային նշանները՝ «Сбер» և «Sber»․ գրում է Frank Media-ն։
Հայտերը ներկայացվել են 2023 թվականի մայիսի 29-ին, գրանցման նշանը հայտնվել է 2024 թվականի հունվարի 29-ին Հայաստանի Հանրապետության մտավոր սեփականության գրասենյակի տվյալների բազայում:
Ապրանքային նշանը վիզուալ առումով նման է այն նույն ապրանքային նշանին, որն օգտագործում է պետական բանկը Ռուսաստանում, սակայն լոգոն և անունը ոչ թե կանաչ են, այլ՝ սև։
Ապրանքային նշանի քարտում գրանցված ապրանքների և ծառայությունների դասերը բանկի համար ստանդարտ են. ֆինանսական ծառայություններ (դրամավարկային և ապահովագրություն), անշարժ գույքի, կրթության ոլորտում ծառայություններ: Ծառայությունների թվում են նաև նյութական ակտիվների անվտանգությունը, իրավաբանական և հեռահաղորդակցման ծառայությունները, նույնականացումը, գովազդը և բիզնեսի կառավարումը:
2023 թվականի փետրվարին բանկին հաջողվել է ապրանքային նշան գրանցել Մոլդովայի Հանրապետությունում: Հաշվառման քարտից պարզ է դառնում, որ ապրանքների և ծառայությունների դասերը մասամբ համընկնում են Հայաստանի դասերի հետ՝ ֆինանսական ծառայություններ, ապահովագրություն, տվյալների բազաների հետ աշխատանք, խորհրդատվություն և այլն։
Բանկի մամուլի ծառայությունը, պատասխանելով Frank Media-ի հարցին, թե ինչ ֆինանսական ծառայություններ է նախատեսում մատուցել այն Հայաստանում, Մոլդովայում և Ուզբեկստանում (որտեղ պետական բանկը մինչ այժմ բացել է միայն կրթական նախագիծ), ասաց.
«Ստանդարտ ընթացակարգ, որը պարտադիր չէ, որ կապված լինի կոնկրետ պլանների հետ: Գործընթացն իրականացվում է բանկի և նրա խմբի բիզնեսի զարգացման և պաշտպանության ռազմավարության իրականացման ուղղությամբ»։
«Որպես կանոն, նման քայլը նոր հնարավորություններ է բացում ՀՀ-ից հաճախորդների ներգրավման համար, ինչը նպաստում է հաճախորդների բազայի ավելացմանը եւ Բանկի կողմից մատուցվող բանկային ծառայությունների ընդլայնմանը»,- նշել է Lawsuit իրավաբանական ընկերության կառավարող գործընկեր Ասյա Հակոբջանյանը:
«Բացի այդ, այն հեռանկարներ է բացում իր տարածաշրջանային ներկայության ամրապնդման և տեղական ընկերությունների և հաստատությունների հետ ռազմավարական գործընկերության զարգացման համար»:
Նրա կարծիքով, «Սբերբանկի» մուտքը Հայաստանի շուկա կարող է բարձրացնել բանկային ծառայությունների ընդհանուր մակարդակը երկրում։