Թուրքիայի Ազգային մեծ ժողովում իշխող Արդարություն և զարգացում կուսակցության (ԱԶԿ) և գլխավոր ընդդիմադիր ուժը համարվող քեմալական Ժողովրդահանրապետական (ՀԺԿ) կուսակցության պատգամավորների միջև վիճաբանություն է տեղի ունեցել, որը վերածվել է քաշքշուկի։
Այս մասին հայտնում է թուրքական NTV-ն։
Ստամբուլի ընդդիմադիր քաղաքապետ Էքրեմ Իմամօղլուի կալանավորումից հետո Ժողովրդահանրապետական կուսակցության (CHP) խորհրդարանական խմբակցության պատգամավորները մարտի 19֊ին որպես բողոքի գործողություն գրավել էին խորհրդարանի ամբիոնը։
Մարտի 20֊ի նիստում ամբիոնի գրավում տեղի չի ունեցել, սակայն լարվածություն է առաջացել CHP-ի և ԱԶԿ-ի պատգամավորների միջև։
Նիստի ընթացքում ընդդիջում է հայտարարվել, և այդ ժամանակ երկու խմբակցությունների պատգամավորները մոտեցել են միմյանց և քաշքշուք է սկսվել։
Մերսինից պատգամավոր Ալի Մահիր Բասարիրը, ով Ժողովրդահանրապետական խմբակցության փոխնախագահն է, օդեկոլոնի փոքր շիշը նետել է իշխող ԱԶԿ խմբակցության պատգամավորների վրա։
Բասարիրը նշել է, որ ներողություն չի խնդրելու իր արարքի համար։ Նախազգուշացում ստանալուց հետո Բասարիրի և ԱԶԿ պատգամավորների միջև կարճատև քննարկումներ են եղել։