Մեծ Բրիտանիան պատժամիջոցներ կսահմանի Ռուսաստանից ածուխի, նավթի եւ ոսկու ներմուծման նկատմամբ, ասված է Թագավորության Արտաքին առեւտրի նախարարության՝ արտահանողներին ուղղված ծանուցման մեջ, հաղորդում է RBC-ն։
«Այս փոփոխությունն արգելում է նավթի եւ նավթամթերքի, ածուխի ու ոսկու ներմուծումը, ինչպես նաեւ այդ ապրանքների ուղղակի կամ անուղղակի ձեռքբերումը, մատակարարումը եւ առաքումը: Այն նաեւ արգելում է այդ ապրանքների հետ կապված տեխնիկական աջակցության, ֆինանսական ծառայությունների, դրամական միջոցների եւ միջնորդական ծառայությունների տրամադրումը:
Ռուսաստանից նավթի ներմուծման արգելքն ուժի մեջ կմտնի դեկտեմբերի 31-ից, ածուխինը՝ օգոստոսի 10-ից։ Բացի այդ, արդեն այսօրվանից՝ հուլիսի 21-ից, կգործի Ռուսաստանից ոսկու ներմուծման արգելքը։
Ածուխի նկատմամբ պատժամիջոցների սահմանման ամսաթիվը համընկնում է Եվրամիության կողմից ռուսաստանյան ածուխի դեմ կիրառվող սահմանափակող միջոցների մեկնարկի հետ։