Թուրքիան գտնվում է Քաթարի հետ բանակցությունների ավարտական փուլում, որոնց շրջանակում կարող է ստանալ մինչեւ $10 միլիարդ ծավալով ֆինանսավորում, այդ թվում`մինչեւ $3 միլիարդ արդեն այս տարի, հաղորդում է Reuters-ը՝ վկայակոչելով աղբյուրները։
Աղբյուրներից մեկն ասել է, որ ֆինանսավորումը կարող է լինել սվոփի, եվրապարտատոմսերի տեսքով կամ այլ եղանակով, եւ որ Թուրքիայի ու Քաթարի ղեկավարները քննարկել են այդ հարցը:
Ինչպես գրում է Reuters-ը, արտաքին ֆինանսավորումը կարող է օգնել ամրապնդել Թուրքիայի արժութային պահուստները՝ աջակցելու նախագահ Ռեջեփ Թայիփ Էրդողանի՝ տոկոսադրույքների նվազեցման եւ խթանման այլ միջոցների քաղաքականությանը՝ չնայած աճող գնաճին եւ լիրայի կտրուկ անկմանը:
Քանի որ արեւմտյան երկրները հրաժարվում են ներդրումներ կատարել Թուրքիայում, Անկարան արտաքին ռեսուրսների համար դիմել է «բարեկամ» երկրներին, գրում է գործակալությունը։
Թուրքիայի Կենտրոնական բանկն արդեն կնքել էր սվոփ գործարք Քաթարի ԿԲ-ի հետ, որն ի սկզբանե արժեր $5 միլիարդ, սակայն 2020 թվականին եռապատկվեց՝ հասնելով $15 միլիարդի:
Reuters-ի աղբյուրից մեկի տվյալների համաձայն՝ այս տարվա համար $2-3 միլիարդի ֆինանսավորման շուրջ բանակցությունները կենտրոնացած են եվրապարտատոմսերի թողարկման վրա: