Ամերիկայի Միացյալ Նահանգները գործող նախագահ Ջո Բայդենի գլխավորությամբ կշարունակի օգնություն ցուցաբերել Ուկրաինային այնքան ժամանակ, որքան անհրաժեշտ է: Այս մասին, «Կոմերսանտ»-ի հաղորդմամբ, հայտարարել է Սպիտակ տան մամուլի քարտուղար Կարին Ժան Պիերը։
Այսպիսով, նա մեկնաբանել է ԱՄՆ Ներկայացուցիչների պալատի փոքրամասնության առաջնորդ Քևին Մաքքարթիի խոսքերը, ով ավելի վաղ հայտարարել էր Հանրապետական կուսակցության անդամների՝ միջանկյալ ընտրություններում հաղթելու դեպքում Ուկրաինային աջակցությունը նվազեցնելու մտադրության մասին:
«Մենք կշարունակենք աշխատել Կոնգրեսի հետ այս ուղղությամբ, ինչպես արել ենք այս յոթ ամիսների ընթացքում, և մենք կշարունակենք աջակցել Ուկրաինային այնքան ժամանակ, որքան անհրաժեշտ է: Եվ սա այն խոստումն է, որը նախագահը (ԱՄՆ, Ջո Բայդեն) տվել է նախագահին (Ուկրաինա, Վլադիմիր) Զելենսկիին», – ասել է Ժան Պիերն այսօրվա ճեպազրույցի ժամանակ, որի ձայնագրությունը հասանելի է Սպիտակ տան կայքում:
Նա ընդգծել է, որ մտադիր չէ գնահատել երկկուսակցական աջակցության հեռանկարը ապագայում Ուկրաինային օգնություն ցուցաբերելու նախաձեռնություններում։
Երեկ՝ հոկտեմբերի 18-ին, ԱՄՆ 44-րդ նախագահ Բարաք Օբաման նշել է, որ ամերիկյան կողմը պետք է շարունակի ֆինանսական ու ռազմական օգնություն ցուցաբերել Ուկրաինային՝ որպես իր դաշնակցի։ Օբաման հավելել է, որ Վաշինգտոնը նաև պետք է սահմանի Ուկրաինային իր ռազմական աջակցության սահմանները, քանի որ հակամարտությունը կարող է վերածվել Ռուսաստանի, ԱՄՆ-ի և ՆԱՏՕ-ի միջև բախման: