Եվրամիության երկրները համաձայնության են եկել գազի գնի սահմանաչափը մեկ մեգավատ/ժամի համար սահմանել €180, նախօրեին հայտարարել է ԵՄ-ում Լեհաստանի մշտական ներկայացուցչությունը։
«Մենք ողջունում ենք ԵՄ նախարարների պայմանավորվածությունը գազի գնի առաստաղի շուրջ՝ մեկ մեգավատ/ժամի համար €180 սահմանում, այն նախատեսում է գների սահմանափակում եվրոպական բոլոր հանգույցների համար»,- ասված է հայտարարության մեջ, որը մեջբերում է «Ինտերֆաքս»-ը:
Ենթադրվում է, որ առաստաղը կաշխատի գազի շուկայի շտկման եվրոպական մեխանիզմի շրջանակում։ Առաստաղը ներկայացնում է այն արժեքը, որին հասնելուց հետո գործարկվում է շտկման մեխանիզմը։ Այս առավելագույն գինը եւ պետք է որոշեին նախարարները։
Իր հերթին ԵՄ Խորհուրդը տեղեկացրել է, որ մեխանիզմը ուժի մեջ կմտնի 2023 թվականի փետրվարի 15-ից
«Էներգետիկայի ոլորտում կարգավորող մարմինների համագործակցության ԵՄ գործակալությունը (ACER) մշտապես կվերահսկի շուկաները եւ եթե նկատի, որ կիրառվել է շտկման մեխանիզմը, իր կայքում կհրապարակի «շուկայի շտկման մասին հաղորդագրություն»»,- նշել են ԵՄ Խորհրդի մամուլի ծառայությունում։
Փաստաթղթում ասված է, որ 2023 թվականի հունվարի 23-ին Արժեթղթերի եւ շուկաների եվրոպական վարչությունը (ESMA) ACER-ի հետ համատեղ կհրապարակի գազի շուկայի շտկման մեխանիզմի ներդրման վերաբերյալ նախնական զեկույցը։