Միլիարդատեր Իլոն Մասկը շուտով կհեռանա պետական ծառայությունից և կվերադառնա իր ընկերությունների կառավարմանը, հայտարարել է ԱՄՆ նախագահ Դոնալդ Թրամփը։ Նրա խոսքը մեջբերում է Politico-ն։
«Նա ունի մեծ ընկերություն, որը պետք է ղեկավարի: Ինչ-որ փուլում նա կվերադառնա իր ընկերությունների կառավարմանը, ինչը շատ է ուզում»,- ասել է Թրամփը: Նա հավելել է, որ կցանկանար աշխատել Մասկի հետ «այնքան, որքան հնարավոր է», և նրան անվանել է «շատ տաղանդավոր տղա»։
Մասկին են պատկանում էլեկտրամեքենաներ արտադրող Tesla-ն, տիեզերական տեխնոլոգիաներ արտադրող SpaceX-ը և X սոցիալական մեդիա ընկերությունը:
Միլիարդատերը նախաձեռնել է Կառավարության արդյունավետության դեպարտամենտի (DOGE) ստեղծումը, որը զբաղվում է ծախսերի կրճատմամբ և դաշնային գործակալությունների վերակառուցմամբ։ Նա կառավարության արդյունավետությունը բարելավելու հանձնաժողովի ղեկավար է, իսկ DOGE-ը պաշտոնապես գլխավորում է Էմի Գլիսոնը, որը աշխատել է Թրամփի վարչակազմում նրա առաջին նախագահական ժամկետում:
Օրենքի համաձայն՝ Մասկը «հատուկ պետական ծառայող» է և վարչակազմում կարող է աշխատել տարեկան 130 օրից ոչ ավելի։ Մարտի 28-ին Fox News-ի հետ հարցազրույցում նա ասել է, որ կկարողանա հասնել իր նպատակներին՝ կրճատել դաշնային կառավարության ծախսերը այդ ընթացքում:
Մասկը որպես պաշտոնյաների զանգվածային կրճատումների առաջին թիրախ ընտրել է ԱՄՆ Միջազգային զարգացման գործակալությունը։ Այստեղ «վերացվելու» են օրենքով չնախատեսված բոլոր հաստիքները, իսկ մնացած «կարևոր և ռազմավարական աջակցության ծրագրերը» մինչև հուլիսի 1-ը կստանձնի ԱՄՆ պետքարտուղարությունը։