«Առողջության իրավունք» ՀԿ-ի նախագահ Անուշ Պողոսյանի ֆեյսբուքյան գրառումը՝ կից տեսանյութով․ «Բազմիցս եմ խոսել բժիշկների անհատական լիցենզավորման ինստիտուտի խնդրահարույց լինելու մասին՝ հատկապես դրա ներդրման մեխանիզմների, շահերի բախման հնարավորությունների, մասնագիտական գնահատման օբյեկտիվության և կոռուպցիոն ռիսկերի տեսանկյունից։
Բազմիցս եմ հարցրել՝ ո՞վ է գնահատելու բժշկին, ի՞նչ չափանիշներով է գնահատելու, ի՞նչ երաշխիքներ են լինելու գործընթացի անկախության և թափանցիկության համար, և ի՞նչ մեխանիզմով է բացառվելու սուբյեկտիվ մոտեցումը։
Ավելին՝ բժշկական հանրույթի իրավունքների հնարավոր խախտումների վերաբերյալ մի քանի անգամ դիմել եմ նաև Մարդու իրավունքների պաշտպանին՝ բարձրացնելով այս գործընթացի իրավաչափության, մասնագիտական իրավունքների պաշտպանության և բժիշկների նկատմամբ հնարավոր անհավասար կամ սուբյեկտիվ մոտեցումների հարցերը։
Եվ ահա այսօր արդեն տեսնում ենք մի իրավիճակ, որն ավելի լուրջ հարցեր է առաջացնում։
Օրենքը մի բան է սահմանում, նախարարի հրամանը՝ նույնպես, իսկ գործընթացը ներկայացնող պաշտոնյայի հայտարարությունը՝ մեկ այլ բան։
ՀՀ «Բնակչության բժշկական օգնության և սպասարկման մասին» օրենքի 35.1-րդ հոդվածի 5-րդ մասը սահմանում է, որ կենտրոնացված քննությունն իրականացվում է մասնագիտական հանձնաժողովների կազմած՝ տեսական գիտելիքների և գործնական հմտությունների վերաբերյալ առաջադրանքների հիման վրա։
Իսկ ՀՀ առողջապահության նախարարի N 131-Ն հրամանի 13-րդ կետը հստակ սահմանում է, որ կենտրոնացված քննությունն իրականացվում է երկու փուլով՝
․ թեստավորում՝ թեստային փուլ,
․ գործնական հմտությունների (կարողությունների) գնահատում՝ սիմուլյացիոն պայմաններում, գործնական փուլ։
Այսինքն՝ իրավական ակտում գործնական փուլը պարզապես ցանկություն կամ առաջարկ չէ․ այն ամրագրված է որպես քննության փուլ։
Բայց ԱԱԻ-ի տնօրեն Ալեքսանդր Բազարչյանը ասուլիսի ընթացքում հայտարարել է, որ կենտրոնացված քննությունը լինելու է միայն թեստավորման փուլով։
Ու այստեղ արդեն առաջանում է շատ պարզ հարց.
Եթե գործող իրավական կարգավորումը նախատեսում է երկու փուլ, ի՞նչ իրավական հիմքով է հայտարարվում, որ քննությունը լինելու է միայն մեկ փուլով։
Օրենքի և ենթաօրենսդրական ակտի պահանջը չի կարող փոխվել ասուլիսի հայտարարությամբ։
Ալեքսանդր Բազարչյանը իմ տասնյակ տարիների գործընկերն է, և ես վստահ կարող եմ ասել, որ նա ունի բարձր պրոֆեսիոնալ հմտություններ։
Ուստի այստեղ հարցը ոչ թե Ալիկի մասնագիտական կարողությունների, այլ որոշումների և իրավական պատասխանատվության մասին է։
Ալիկ ջան, եթե քեզ ստիպում են օրենսդրությանը հակառակ հայտարարություններ անել՝ նշան տուր։ Օրինակ՝ համակարգող փոխնախարարի հերթական օրը երկու անգամ տարածիր սոցիալական հարթակում։
Իսկ եթե լուրջ՝
Տղանե՛ր և աղջիկնե՛ր, դուք նույնիսկ ձեր իսկ ներկայացրած «լուրջ ռեֆորմը» տապալել եք։ Դուք լրջորեն մտածո՞ւմ եք, որ բժշկի կողմից 30 թեստ լուծելը բարձրացնելու է առողջապահական համակարգի որակը»։