2025 թվականի ընթացքում անշարժ գույքը վարձակալությամբ հանձնած քաղաքացիները պետք է սահմանված ժամկետներում կատարեն իրենց հարկային պարտավորությունները։ Պետական եկամուտների կոմիտեն հիշեցնում է գործընթացի հիմնական քայլերի մասին և ներկայացնում հարկային հայտարարագրման ու վճարման կարգը։ 

1. ՀՎՀՀ ստացում․ Եթե դեռ չունեք, անհրաժեշտ է առցանց կամ հարկային մարմնի սպասարկման կենտրոնում ստանալ Հարկ վճարողի հաշվառման համար (ՀՎՀՀ):
2. Նախալրացված հայտարարագիր․ ՊԵԿ-ն իր տեղեկատվական բազայում առկա տվյալների հիման վրա նախալրացնում է հայտարարագիրը: 
3. Փոփոխում և հաստատում․ Վարձատուները մինչև նոյեմբերի 1-ը պետք է մուտք գործեն համակարգ, ստուգեն, անհրաժեշտության դեպքում փոփոխեն և հաստատեն տարեկան հայտարարագիրը:
4. Հարկի վճարում․ Անշարժ գույքի վարձակալությունից ստացված եկամուտների համար սահմանված է 10% եկամտային հարկ (տարեկան 60 միլիոն դրամը գերազանցող մասի համար կիրառվում է լրացուցիչ 10% դրույքաչափ)։

• Պետական գրանցում չունեցող պայմանագրեր․ Եթե վարձակալությունը նոտարով կամ կադաստրով ձևակերպված չէ, քաղաքացին պարտավոր է այդ մասին հայտարարություն ներկայացնել հարկային մարմին:
• Ավտոմատ ներկայացում․ Եթե մինչև նոյեմբերի 1-ը քաղաքացին ինքնուրույն չի հաստատում կամ փոփոխում հայտարարագիրը, ապա ՊԵԿ նախալրացրած տարբերակը ավտոմատ համարվում է ընդունված օրենքով սահմանված կարգով։