Այս տարվա առաջին եռամսյակում կիբեռհանցագործները ռուսաստանցիներից 4,5 մլրդ ռուբլի (մոտ 56 մլն ԱՄՆ դոլար) են գողացել։ Այս մասին ասվում է ՌԴ Կենտրոնական բանկի «Դրամական միջոցների փոխանցման ժամանակ տեղեկատվական անվտանգության միջադեպերի մասին» հաշվետվության մեջ, հայտնում է rg.ru-ն ։
Ընդհանուր առմամբ, հունվար-մարտ ամիսներին ռուսական բանկերը հետ են մղել 2,7 միլիոն հարձակում հաճախորդների հաշիվների վրա ՝ կանխելով 712 միլիարդ ռուբլու գողություն:
Հանցագործներին հաջողվել է 252,1 հազար գործողություն իրականացնել, այդպիսով գողանալով 4,5 մլրդ ռուբլի: Ամենից շատ գումար նրանք գողացել են օնլայն բանկինգի փոխանցումների միջոցով։
Ինչպես նշվում է զեկույցում, խարդախների սխեմաները դառնում են ավելի բարդ, նրանք ամբողջությամբ օգտագործում են սոցիալական ինժեներիայի մեթոդներն ու այնպես են խաբում, որ զոհերը համաձայնում են կամավոր գումար տալ:
Հունվար-մարտ ամիսներին Կենտրոնական բանկը նախաձեռնել է 97 հազար հեռախոսահամարների արգելափակում, որոնցից խարդախները զանգահարել են մարդկանց: Կարգավորիչը նաև նախաձեռնել է 8,3 հազար ֆիշինգային կայքերի արգելափակում, որոնք ներկայանում են որպես բանկերի, ապահովագրական կազմակերպությունների, արժեթղթերի շուկայի մասնակիցների, գերեկամտաբեր ներդրումային ապրանքներ առաջարկող կազմակերպությունների պաշտոնական էջեր։