ԱՄՆ-ի բանկային համակարգն անընդհատ շղթայական խափանումներ են արձանագրվում։ Սա խոսում է տնտեսությունում կուտակված խնդիրների մասին։ Այս իրավիճակին արագ հանգուցալուծում չտալու դեպքում ԱՄՆ ֆինանսական համակարգում իրավիճակը կարող է է՛լ ավելի բարդանալ՝ վտանգելով միջազգային ֆինանսական կայունությունը։
Հիմա էլ հերթը First Republic Bank-ինն է։ Վերջինս ստեղծվել է դեռևս 1985թ-ին և տեղակայված է ԱՄՆ-ի Սան Ֆրանցիսկո քաղաքում։ Կալիֆոռնիական այս բանկը հիմնականում մասնագիտացած է հիփոթեքային վարկավորման մեջ։ Բանկն իր ողջ պատմության մեջ փոխել է սեփականատերերին՝ մեկի ձեռքից անցնելով մյուսին։ Հիմա էլ բանկը վաճառվել է JP Morgan Chase-ին։ Սակայն պետք է նշել նաև, որ ոչ թե JP Morgan Chase-ը ցանկացաել է գնել բանկը, այլ First Republic Bank-ի գործերը կտրուկ վատթարացել են և իրավիճակը փրկելու նպատակով JP Morgan Chase-ը գնելու առաջարկ է ստացել Ավանդների ապահովագրության ֆեդերալ կորպորացիայից՝ FDIC-ից։ Բանկն անցել է FDIC-ի վերահսկողության տակ Կալիֆոռնիայի նորարարությունների և ֆինանսական պաշտպանության դեպարտամենտի որոշմամբ։
Սակայն, հետաքրքիր է հասկանալ, որտեղից սկսվեց First Republic Bank-ի անկումը․
Գծապատկեր 1․ First Republic Bank-ի անկման իրադարձությունների շղթան
2023թ-ի մարտի 10-ին First Republic Bank-ի արժեթղթերի վաճառքը դադարեցվեց, քանի որ նկատվում էին ագրեսիվ վաճառքի միտումներ ներդրողների կողմից։ Այնուհետև արժեթղթերի վաճառքը վերսկսվեց, սակայն արժեթղթերի գինը կտրուկ ընկավ, երբ բանկի ղեկավարությունն ապրիլի 24-ին հայտարարեց բանկի ավանդների $100 մլրդ-ով կրճատման մասին։
Նշենք, որ եռևս 2023թ-ի ապրիլի 13-ին բանկի ավանդների ծավալը կազմում էր $103,9 մլրդ։ Այս նորությունն է՛լ ավելի արագացրեց բանկի անկումը և արդեն 2023թ-ի ապրիլի 26-ին բանկի մեկ արժեթղթի գինը կազմում էր $4,6։ Նկատենք, որ դեռևս 2023թ-ի փետրվարին բանկի մեկ արժեթղթի արժեքը կազմում էր $143։
Փաստացի, սնանկացման եզրին կանգնած բանկը հանձնվեց ոչ միայն ԱՄՆ-ի, այլև աշխարհի մասշտաբով խոշոր բանկերից մեկին՝ JP Morgan Chase-ին, որը ձեռք բերեց բավականին հետաքրքիր կապիտալ․
Գծապատկեր 2. JP Morgan Chase-ը First Republic Bank-ի սեփականատերի կարգավիճակում
Պարզվում է՝ First Republic Bank-ից JP Morgan Chase-ին որպես ժառանգություն անցել է $172 մլրդ-ի վարկեր, $30 մլրդ-ի արժեթղթեր և $92 մլրդի ավանդներ։