Ղազախական «ԿազՏրանսՕյլ» (KTO) ազգային ընկերությունը սկսել է ղազախական նավթի ընդունումը նավթամուղ՝ Գերմանիա արտահանելու նպատակով։
Այս մասին փետրվարի 23-ին հայտարարել է «ԿազՏրանսՕյլ» (KTO) ազգային ընկերության հասարակայնության հետ կապերի և ներքին կապերի բաժնի տնօրեն Շինգիս Իլյասովը։
Նա նշել է, որ Ղազախստանի էներգետիկայի նախարարության կողմից հաստատված նավթի մատակարարումների ժամանակացույցի համաձայն, ընկերությունը փետրվարին «Դրուժբա» խողովակաշարով 20 հազար տոննա նավթ է տեղափոխել Ադամովա Զաստավա նավթի առաքման կետ՝ հետագայում Գերմանիա առաքելու նպատակով։
2022 թվականի դեկտեմբերին «ԿազՏրանսՕյլ» ԲԲԸ-ն տարեկան հայտ է ուղարկել 2023 թվականին Ադամովա Զաստավա նավթի առաքման կետի ուղղությամբ 1,2 միլիոն տոննա ղազախական նավթ տեղափոխելու համար:
Ինչպես հաղորդվում է, եվրոպական երկրները ռուսական նավթից կախվածությունը նվազեցնելու ծրագրերի շրջանակում դիմել են Ղազախստանին՝ հումքի մատակարարման խնդրանքով։ Ռուսաստանը հավանություն է տվել Ղազախստանի հայտին՝ ղազախական նավթը «Դրուժբա» մայրուղային նավթամուղով Գերմանիա փոխադրելու վերաբերյալ։ Առաջին եռամսյակում ԿազՏրանսՕյլ»-ը նախատեսում է 300 հազար տոննա ղազախական նավթ տեղափոխել Գերմանիա:
Ղազախստանի էներգետիկայի նախարարության ղեկավար Բոլատ Ակչուլակովը լրագրողներին հայտնել է, որ հանրապետությունը նախատեսում է 2023 թվականին Գերմանիա արտահանել 1,5 մլն տոննա նավթ և կարող է մեծացնել ծավալը հասցնելով մինչև 7 մլն տոննայի։