Կառավարությունն այսօր ընդունել է որոշում, համաձայն որի ժամանակավոր արգելք է սահմանվում Հայաստանից ավտոմեքենաների խլացուցիչների օգտագործված կատալիզատորների կերամիկական թափոնների արտահանումը:

Նշվում է, որ համաձայն վիճակագրական տվյալների, վերջին տարիներին ՀՀ-ից նկատվում է ավտոմեքենաների խլացուցիչների օգտագործված կատալիզատորների կերամիկական թափոնների արտահանման ծավալների զգալի աճ, ինչը պայմանավորված է նրանով, որ ՀՀ տարածքում հաշվառված տրանսպորտային միջոցներից զանգվածաբար հանվում եւ վաճառվում են կատալիզատորները, հետագայում դրանց վերամշակման արդյունքում թանկարժեք մետաղներ, (ոսկի, պլատին, պալադիում եւ ռոդիում) առանձնացնելու նպատակով։

Մասնավորապես՝ 2019 թ. ՀՀ-ից այդ ապրանքատեսակների արտահանման ընդհանուր ծավալը կազմել է $81481,0 հազար, այդ թվում՝ ՌԴ՝ $80716,0 հազար, Լիտվա՝ $335,0 հազար եւ Գերմանիա՝ $204,0 հազար, 2021 թ.՝ արտահանման ընդհանուր ծավալը կազմել է $732,0 հազար, այդ թվում՝ Լիտվա՝ $479,0 հազար, ՌԴ՝ $157,0 հազար, ԱՄՆ՝ $80,0 հազար:

Որպես առաջացած խնդրի լուծման երկարաժամկետ տեսլական՝ կառավարությունը դիտարկում է առաջիկա տարիներին օտարերկրյա ներդրումների ներգրավումը, ինչն ուղղված կլինի Հայաստանում համապատասխան կազմակերպության հիմնադրմանը, որը կիրականացնի խլացուցիչների օգտագործված կատալիզատորների կերամիկական թափոնների վերամշակում, ինչն իր հերթին կնպաստի նոր աշխատատեղերի ստեղծմանը։