Բրիտանական HSBC բանկը համաձայնություն է ձեռք բերել Կանադայում իր ստորաբաժանումը տեղական Royal Bank of Canada-ին (RBC) վաճառելու շուրջ, հաղորդում է Finmarket-ը՝ վկայակոչելով բանկի հաղորդագրությունը։
RBC-ն ձեռք կբերի HSBC Canada-ի սովորական բաժնետոմսերի 100%-ը 13,5 միլիարդ կանադական դոլարով ($10,1 միլիարդ) եւ կգնի ընկերության 1,1 միլիարդ կանադական դոլարի արտոնյալ բաժնետոմսերը եւ 1 միլիարդ կանադական դոլարի ստորադաս պարտքային պարտավորությունները:
Այսպիսով, գործարքի ընդհանուր արժեքը կկազմի 15,6 միլիարդ կանադական դոլար ($11,6 միլիարդ): HSBC-ն ակնկալում է, որ մինչեւ հարկումը եկամուտը գործարքից կկազմի շուրջ $5,7 միլիարդ, իսկ գործարքը փակելուց հետո առաջին մակարդակի կապիտալի համարժեքության գործակիցը (CET1) կավելանա 130 բազիսային կետով:
Սպասվում է, որ գործարքը կավարտվի 2023 թվականի վերջին։
HSBC Bank Canada-ն երկրի յոթերորդ խոշոր բանկն է: 2021 թվականի վերջին բանկն ուներ $94,6 միլիարդի ակտիվներ եւ $58,1 միլիարդի ավանդներ: Անցած տարի բանկի շահույթը մինչեւ հարկումը կազմել էր $768 միլիոն: HSBC-ն Կանադայի շուկա էր մուտք գործել 1981 թվականին եւ այնուհետեւ ընդլայնվել միաձուլումների եւ ձեռքբերումների հաշվին: